Begiak itxi
eskuak zabaldu
argia itzali
zirrara baretu
Ez nazazu
hitzekin hesitu
grina isilen
gogoa lokartu
Eta orain esan
zein da zuretzat
amesgaiztorik
ulertezinena
Amets bat egin nuen
eta ezin dut ahaztu
horregatik nahi dizut
zuri gaur kontatu
Basora joan nintzen
zazpi zotzen bila
handik itzuli nintzen
zazpi aldiz hila
Ez nuen nahi
esnatu
Hormetan barrena
entzuten dut dena
zenbat munstro
zure baitan
gauero berpiztuak
Goizeko euriak
estali zauriak
gure egun faltsuetan
jokatzen da dena
Indar gardenak
gailentzen dira
kemen ahulengan
Ez zintudan
ahantzi nahi
egun berrietan
barrena
Lagunen etxean
begien atzean
saminak gordetzen dira
giltzapean
Zauriak ez dira
leihotik ikusten
Ohepeko
gerlaria
denboraren
zaindaria
Gauez esna
egunez lo
ordu denak
zenbatzeko
hutsartetan
altxor gordeak
aurkitzeko
Batzuetan
hain eroa
gameluen
bezeroa
Txikitatik ikasia
denboraren eskasia
norberaren
barne goseak
nahasia
Odoleko
seinaleen
egiaztatzailea
zu zara
Hitz ilunak
labankadak bezala
sartzen dira
zeharkatuz azala
Harenak
ezin kontutan hartu
herrenak
gogorregi dihardu
Eta zure ispiluan
nahi nuke atseden hartu
ilargiaren distira
errekan ikusi nahi dut
Zure hitz leunak
iraganean
gaur iragarkizunak
nire gainean
Desio aseezinen
trenaren barnean
guztia hondoratzen da
alboetan
Eroritako
lurrean nago
harri gogorrenaren
meatzuloan
dena ahaztu nahian
ihes geldoan
begiak eskuetan loturik
orduak estutu nahian
minari
sabaia estali nahiean
zuretzat
Zure doinua
entzun al nuen
unibertsoaren
beste aldean?
Hiltzaile isila
eta geldoa
buztinezkoa
zure eskuetan
Argiak ez zuen nahi ilundu
ilunak ez zuen nahi argitu
Egunen magalean gorderik
zauriak
zentzumenen atzean gorderik
argi isila
ez zinen agertu
distira isila
Nire destinorik
ez zenuen ikusten
nire erregurik
ez zenuen entzuten
Lurrikarak
zirrara ametsen ostean
Zilarra
izarak zikintzean
Barrikada ilara
hitzak amaitzean
Ihintza da islada
ilunpetan agertzen zara
Leihoak daude
leihoen barnean
ixten dira nolanahi
zure zain gelditzean
korronteen gauza da
gertakari bakarra
beldurrez estalia
kobaren barnean
Ni ez naiz
ametsetan
irauli
zenuena
Ez nauzu ukitu
gaua zelako
ez nauzu suntsitu
ni naizelako
ez nauzu ikusi
ez nauzu entzun
zure bizkarrean
ez nauzu aditu
alferrik ari naiz
kode zaharrean
Hitzak ozenegi
dena gardenegi
kristalen gauean
ahapeka eta mehe
lauso eta indarge
gauean
Goiz iratzartzean
zu aldamenean
ni hegan bidean
deus ez bestaldean
Amets honetan
iratzarri naiz
ezagutza berrien jabe
oraindik ez dakit
zure bihotzean
zer ezkutatzen den
urrun joan nahi nuke
begiak itxi
ta ez ikusteko
oraindik ikusi ezin
diren argi guztiak
atzemanez
Ireki begiak
amaitu da guztia
izara zuriak
beltza du zauria
Orain hitzek
ez dute sinisten
orain hotsek
ez dute sentitzen
Ireki begiak
amaitu da guztia
Ezin ikusi
buruan dut guztia
ametsen burrunba
herrenaren kulunka itzalia
bertan duzu
urik zikinena
zure haginetan
geratu den hondarra
al da mundua
bere ekaitzekin
bere umerzurtzekin
oihuka kalean
ametsen errari
beltza den minari
esan nion baietz
esnatu zinela
goizean etzanda
gauean uluka
ametsen kulunka
ur zikinenetan
Egur beltza
goiz itzalia
zomorro faltsua
mahai herrena
ikatz zuria
aurpegi zimela
buru okerra
arnas ozena
erritmo traketsa
indar dohakabea
abiadura ezdeusa
kirats errebeldea
sabai okerra
esku zulatua
Herrialde zekena da zerua
zure hatzen menpe
estututa dabilenean
hasperenak begietan
errugabetasunaren goilara faltsua gibelean
hitz hartze astunak
komunean baino ez zenuen barkatzen
oilasko herdoilduen pean
asun dohakabea ahoan
kontzientziaren labana eskuan
aterpe eske etorri zinenean
Isiltasuna parkean
agure eroa balkoian
amildegi txikia arraskan
leiho hautsia bihotzean
zozo txikia atarian
elur bustia buru gainean
zekena da paradisua
Abereen ondoan Aberdeen
Abereen Aberdeen
txikia
itzalia
nahiago lukete hautsez jardun
odolki motzak
ilunabar ustelak
aterki hutsalak
Abereen lurraldea da Aberdeen
zuztar beltza
irrati zoroa
amesgaizto motza
Eroria
abaildua
amets txikienak poltsikoan
aker beldurgarriaren atzean
ikustezina da belarra
izugarria da ekaitza
ez dago ahaleginik goizetan
erleak beldurtu dira arratsaldean
zuhaitz batek ez du zuk baino gehiago balio
azalera mardulenak ere salgai
amaitu da jardunaldia EITB-ko bulegoetan
Errietan herrietan
azaldu ezinez tristura
hitzak badoaz hegan
minbera daude mamiak
asaldura ahoetan
hitzik gabe alkatea
inurriak lasai
mugikorrak joka
buru soilduak distiratsu
ulertzen al duzu orain?
Azalean arazoak
kamuts kronometroa
eztanda isilak besapeetan
aukera gutxi zeruan
zu, izularri betearekin
amonaren oroitzapenetan igeri
hemen, gerriaren gerran
eztul ekaitzaren biharamunean
Western Union
Lucky Strike
J’hayber
Bitter Cinzano
eta gainontzeko izen arrotz kuttunekin
goizari tamaina hartzen diozu
auzoari itzulia eman
zebrabideak aztertu
diamantez zulatu banketxeen kristalak
eta sirena hotsen babesean
altxorrarekin ihes egiten duzu
Itxura txarra
du zure atariak
odolez gainezka
etxe handia
etxe zuritxoa
amari txanpon eske
ikara eskuetan
ametitu ezinezko lotsa
bizilagunak haserre
zintzurra itxita dagoeneko
azeriak bistan
ura bultzaka
ura topeka
heriotza bazter guztietan
Barra barra zure eskuak airean
ezina da gure auzoaren lekuko
haize-orratzak lepotik segika
inuxente xamar agintariak
ogikadak buruetan
ehiza-txakurrak zubia zeharkatzen
urrutiko intxaurrak erabat armatuta
belarrik ez zelaian
zure familia osoa dantzan
entzun
eragiozu beste behin
Burusoila da zure harrotasuna
alferrikako burbuilak odolean
erreskatea belaunetan
ikara oinetan
Dinosauru bat da zure lepahezurra
alferrikako hostoak bekokian
harrapakina odoletan
kapela buruan
Etze luzea
zure buru gainean
azal gutxi
erritmo gutxi
buru zurien arabera
ezponda kutsatua zure sabelean
esan ala ez esan
harrapatu zure esku kamutsa
iragazi salda merkea
ezin ikusi iragana
isiltasun kosmikoa hesteetan
hara non datorren bizikletan
urmael distiratsuen esperoan
joan zena
hemen da barriro
Liburukin ustela
harrapatu dut bazterrean
zera zekarren
etsitze zaharrak
kosmonauta ahaztuak
irudi abandonatuak
txiroei donatuak
gaizki eta alferrik kontserbatuak
eta hantxe aurkituko
hitz zoragarriak
irudi distiratsuak
ideia ahaltsuak